सत्ताधारीलाई देश निकाला गर्नुपर्छ : गुरुङ

रोल्पा, पुस १० - नेकपा-माओवादीका सचिव देव गुरुङले अहिलेाक सत्ताधारी भ्रष्टाचारी भएको भन्दै उनीहरुलाई मुलकबाटै निकाला गर्नुपर्ने धारणा राखेका छन् । अख्तियार दुरुपयोग अनुसन्धान आयोगलाई बलियो बनाएर उनीहरुको भ्रष्टाचारी प्रवृत्ति उदांगो पार्नुपर्ने उनको राय थियो ।
कानुनी शासन स्थापना गरेर 'कम्युनिष्टका भ्रष्टाचारी' लाई जेलमा नकोचेसम्म जनताले नसहने गुरुङको भनाई थियो । अधिकांश समय वर्तमान सरकार र एमाओवादीप्रति कटाक्षमा खर्चिएका उनले प्रधानमन्त्री बाबुराम भट्टराई भारतीय इशारामा चल्ने गरेको आरोप लगाए ।
मगरात राज्य समितिको पहिलो सम्मेलनको उद्घाटन गर्न रोल्पा आएका पूर्व मन्त्री गुरुङले मंगलबार भने, 'प्रचण्ड बाबुरामहरु संविधानसभा भङ्ग गरेर सत्तामा लिप्त हुन चाहन्छन् ।'  - ekantipur